Сапарға шыққан жолаушылар үшін маңызды ақпарат. FlyArystan әуе компаниясы жолаушылар қауіпсіздігін күшейту мақсатында жаңа талаптарды енгізетінін хабарлады. Бұл өзгерістер 7 мамырдан бастап күшіне енбек.
Жаңартылған ережелерге сәйкес, қуаттағыш құрылғыларды, яғни power bank тасымалдау тәртібі нақты регламенттеледі. Егер құрылғы қуаты 100 ватт-сағатқа дейін болса, оны арнайы рұқсатсыз алып жүруге мүмкіндік бар.
Ал қуаты 100-ден 160 ватт-сағат аралығындағы қосалқы аккумуляторлар тек әуе тасымалдаушының келісімімен ғана қабылданады. Бұл – қауіпсіздік талаптарының басты шарттарының бірі.
Ал 160 ватт-сағаттан жоғары қуаттағы құрылғыларды ұшақ бортына алып кіруге қатаң тыйым салынады. Мұндай шектеулер әуе кеңістігіндегі қауіпсіздікті қамтамасыз ету үшін енгізіліп отыр.
Сонымен қатар, әр жолаушы өзімен бірге екіден артық қосалқы аккумулятор ала алмайды. Ең бастысы – бұл құрылғылар тек қол жүкте болуы тиіс. Жүк бөліміне тапсыруға рұқсат жоқ.
Тағы бір маңызды ескерту: ұшу барысында power bank құрылғыларын қолдануға немесе оларды зарядтауға болмайды. Сондықтан сапар алдында барлық қажетті құрылғыларыңызды алдын ала дайындап алған жөн.