Жыл аяғына дейін елдегі бүкіл автосалондарға отандық көліктер жеткізіледі. Оған елдегі өндірушілердің қабілеті жетеді.

«Қазақстан автобизнес қауымдастығының» өкілі Анар Мақашева 4 пайыздық автонесиенің қайта жандануы байланысты өткен брифингіде осындай мәлімет айтты. Шара барысында журналистер 4 пайыздық автонесиеге сұраныс көп болғанымен, салондарда көлік аз екенін айтып, кезекті қалай сейілтуге болатынын сұрады.

«Автосалондарда көліктер бар. Былтыр біздің Hyundai Trans Kazakhstan және «СарыарқаАвтоПром» дейтін екі өндірушіміз жалпы көлемде 90 мыңдай көлік өндірген болатын. Биыл өндіріс көлемі 20 пайыз өседі деген болжам бар. Сонда жыл аяғына дейін Қазақстан қалаларындағы автосалондардың бәрінде көлік болады деп топшылап отырмыз. Қазір әрбір автоөндіруші өздері электронды кезек түзіп жатыр. 4 пайыздық несие алушы Қазақстан аумағындағы авиосалондарға келіп, таңдай алады. Яғни, адам өзі сатып алғысы келетін көлікті таңдайды. Содан кейін таңдалған көлік қашан дайын болатынын айтады. Ай сайын өндірістен автосалондарға келіп түсетін көліктер сол тұтынушылардың VIN-код көрсетілген есептесу парағы бойынша үлестіріледі. Бұл ереже бүкіл автосалондарға ортақ», - деді Анар Мақашева.

Айта кетейік, бүгін Қазақстанда 4 пайыздық жеңілдетілген автонесие беру басталды.

4 пайыздық автонесие зейнеткерлерге берілмейді. Бұл туралы «Центр Кредит» банкінің өкілі Гүлжаһан Хамитова айтты. 

«Бүгінде зейнеткерлер бойынша айтсақ, зейнет жасының аясында белгілі бір кезең бар және кредиттеу несие беру зейнет жасына дейін ғана көзделеді», - деді банк өкілі.

Бұл жобаға қатысатын 4 екінші деңгейлі банк анықталды. Олар: «Халық банк», «Банк ЦентрКредит», «Форте банк» және Еуразиялық банк».

«Бұлардың қатары әлі де кеңеюі мүмкін. Қазір өнеркәсіпті дамтыу қоры басқа банктердің де өтініштерін қарастырып жатыр. Ол өтініштер мақұлданса, банктер саны көбейеді», - деді қордық басқарма басшысы Ғалымжан Әди.

Фото: mail.kz, kapital.kz