Елімізде журналистердің мәртебесін белгілейтін заң жобасы дайындалып жатыр.

Бұл туралы Ақпарат және қоғамдық даму министрі Дархан Қыдырәлі Түркістан облысындағы БАҚ басшыларымен кездесуінде мәлімдеді.

Басқосуда Дархан Қуандықұлы журналистерді дайындау мен біліктілігін арттыру және статусын көтеру тұрғысынан жүзеге асатын жобалар туралы айтты.

«Мәжіліске ұсынылуы жоспарланып отырған масс-медиа туралы заңның басым бағыты бұл журналистердің статусын көтеруге бағытталған. Біріншіден, журналистерге әлеуметтік жағдай жасау көзделіп отыр. Бірақ, бұл журналистің сөз бостандығын шектемейді. Жеңілдетілген несие алуына, баспанамен қамтылуына мүмкіндік береді», - деді ол.

Сондай-ақ, министр заң жобасына сәйкес БАҚ өкілдерінің ақпаратқа қолжетімділігі артатынын айтып өтті.

«Журналиске берілетін жауаптың мерзімін қысқартуды ұсынып жатырмыз. Журналисттік зерттеуге қатысты болатын кез келген ақпаратқа журналист жеңіл қол жеткізуі керек»-деді министр.

Дереккөз ҚазАқпарат. Фото: mobillegends.net