Экстрадициялау туралы шарттың болмауына қарамастан, Швецияның әділет министрлігі қарым-қатынас қағидаты негізінде жалған банкноттарды ірі мөлшерде айырбастағаны үшін іздеуде жүрген азаматшаны елге қайтару туралы Қазақстан Бас прокуратурасының өтінішін қанағаттандырды, деп хабарлайды ведомствоның баспасөз қызметі.

Б. есімді әйел 2019 жылғы желтоқсан мен 2020 жылғы қаңтар аралығында Қазақстан банктерінің бірінде қызметкерлердің көмегімен жалған еуро банкноттарын заңсыз айырбастады деген күдікке ілінді.

Қылмыс жасағаннан кейін қазақстандық құқық қорғау органдарынан жасырынған оған халықаралық іздеуге жарияланған.

"Оның серіктестеріне әртүрлі мерзімге бас бостандығынан айыру туралы үкім шыққан. Бүгін Бас прокуратура мен Қаржылық мониторинг агенттігінің қызметкерлері Сыртқы істер министрлігінің көмегімен күдіктіні қылмыстық жауапқа тарту үшін Қазақстанға экстрадициялады", - деп жазылған хабарламада.

Белгілі болғандай, қазіргі уақытта ол Астанадағы тергеу изоляторына қамалды. Жоғарыда аталған қылмысты жасағандар 5 жылдан 10 жылға дейін бас бостандығынан айырылуы мүмкін.

Қазақпарат