Қазақстан қор биржасы алаяқтар туралы ескертіп, олардың алдау тәсілдерін айтып берді.

"Инвестициялық қызметке қатысты кейбір лицензиясы жоқ тұлғалардың заңсыз әрекеті көбеюіне байланысты азаматтарды қырағы болуға және қаскүнемдердің айла-амалына түспеуге шақырамыз. Әлемде, соның ішінде Қазақстанда нарықта қаржы құралдарымен сауда жасау үшін жалған рұқсатты пайдалана отырып, интернет-алаяқтық жағдайлары жиілеп кетті. Оның үстіне алаяқтар KASE атынан әрекет ете бастады", - делінген хабарламада.

KASE ешқашан биржаның немесе оның қызметкерлерінің тікелей қатысуымен жеке немесе заңды тұлғаларға биржалық нарықтарда баю үшін қызмет ұсынбайтынын ресми түрде мәлімдеді.

"Алаяқтардың көпшілігі өте кең таралған схеманы пайдаланады: олар танымал WhatsApp, Telegram мессенджерлері, әлеуметтік желілер, электрон пошта арқылы жұмыс істейді және қоңырауларды пайдаланады. Сонымен қатар, бұл тұлғалар өздерін биржа қызметкері ретінде таныстырып, бағалы қағаздарға инвестициялауды ұсынады. Олар әлеуетті құрбанға жоғары инвестициялық табыс, кеңес беру және соған байланысты қызметтерді уәде етеді, олар үшін әртүрлі сомаларды болжалды делдалдық шоттарға аударуды сұрайды", - делінген KASE хабарламасында.

Сонымен қатар, көп жағдайда шабуылдаушылар бұрын салынған қаражаттың барлық сомасын дереу алу үшін депозитке қосымша сома салуды талап етеді.

Жеке мүлікті қорғау мақсатында биржа қазақстандықтарға келесі қарапайым ережелерді сақтауды ұсынады.

"Сіз назар аударатын бірінші нәрсе - брокер лицензиясы. Брокерлер тек уәкілетті органның – Қазақстан Республикасының Қаржы нарығын реттеу және дамыту агенттігінің лицензиясы негізінде және делдалдық қызметтерді көрсету туралы тиісті шарт жасалған жағдайда ғана жұмыс істейді. Қаржы делдалдарының қызметі Қазақстан Республикасының Азаматтық кодексімен, Қазақстан Республикасының "Бағалы қағаздар нарығы туралы" Заңымен және Қазақстан Республикасының басқа да нормативтік құқықтық актілерімен қатаң реттеледі.

Екіншіден, лицензияны тексергеннен кейін брокерлердің сенімділігін басқа параметрлер бойынша бағалау қажет. Компанияның рейтингі, оның қаржылық көрсеткіштері және акционерлері - осы критерийлердің бәрі брокердің сенімділігін көрсетеді", - дейді мамандар.

Алаяқтықтың кез келген түріне тап болсаңыз, +7 (727) 237 10 00 сенім телефоны арқылы қаржы тұтынушыларының құқықтарын қорғау бойынша Қаржы нарығын реттеу және дамыту жөніндегі агенттігіне хабарласуға кеңес берілді.

Дереккөз Tengrinews.kz. Фото:liter.kz, egemen.kz