Алматы тұрғындары алаяқтықтың тағы бір түріне тап болғандарын айтты. Зат сатып алу кезінде алаяқтар мобильді аударымның жалған чегін көрсетіп, тауарды алып кетеді. Сөздерінше, чектің түпнұсқадан еш айырмашылығы жоқ.

   Тек биылдың өзінде Алматы полициясында алаяқтықтың мыңнан аса дерегі тіркелген. Олардың көпшілігі банк қосымшасы арқылы ақша аударғанда болады екен. 

   Алаяқтар жалған чек алу үшін электронды ботты қолданады. Алатау ауданында осындай 20 дерек тіркелген. Ал чектің жалған екенін ешкім білмеген. Прокуратура қызметкерлері зардап шеккендердің көп екеніне сенімді. Дегенмен барлығы құқық қорғау органдарына шағымданбайды.

   “Алаяқ телефон сатып алу кезінде мені 210 мың теңгеге алдап кетті. Мұнда күдікті ештеңе жоқ, көз алдымда істеді. Арыз жазу туралы ойлаған да жоқпын, себебі көп жағдайда телефон болмай қалады. Алысқа кеткен соң, таба алмай қаласың", – деді сатушы Мақсат. 

   Алаяқтық жасағандар екі жылға дейін бас бостандықтарынан айырылуы мүмкін. 

   "Тек Алатау ауданында 3 қылмыстық іс тіркелді, олардың 2-і сотқа жіберілді, үкім бар, 3-ші іс аяқталуға жақын", – деді Алатау ауданының прокуроры Ізбасар Масақбаев. 

   Қазір прокуратура қызметкерлері банктерге қауіпсіздік үшін қосымша шаралар енгізу бойынша ұсыныс енгізген. 

   Stan.kz