Малайзиялық Air Asia X әуе компаниясы Қазақстанға тұрақты жолаушылар рейсін ашпақ.  

      Бұл туралы көлік министрлігінің азаматтық авиация комитеті мәлімдеді. Енді аптасына 4 рейс Куала-Лумпур – Алматы бағытында ұшатын болады.

      "2024 жылдың 1 ақпанынан бастап малайзиялық Air Asia X әуе компаниясы Куала-Лумпур – Алматы бағыты бойынша аптасына 4 рейс жиілігімен (сейсенбі, бейсенбі, сенбі және жексенбі) А-типті ұшақтарда тікелей тұрақты жолаушылар рейсін орындауды жоспарлап отыр, – делінген хабарламада.

     Азаматтық авиация комитетінің мәліметінше, Қазақстан мен Малайзия арасындағы әуе қатынасының ашылуы елдер арасындағы сауда-экономикалық, іскерлік, инвестициялық, туризм және мәдени ынтымақтастықты одан әрі дамытуға ықпал етеді.

      Компанияның флотында А-320, А-320нео, А-321нео және А-330 үлгідегі 270-тен астам ұшақ бар.