Жақында Қазақстанда Қытайдың үш түрлі көлігін шығаратын жаңа зауыттың құрылысы басталды. Автосарапшылар бұл жаңалықты жақсы қабылдады. Сондай-ақ олар аспан асты елінің көліктерін сатып алуға тұрарлық па? Басқа брендтермен салыстырғанда қандай артықшылығы бар деген сауалдарға ҚазАқпарат тілшісі жауап іздеп көрді.

Соңғы кездері қазақстандықтар қытай автокөліктерін көптеп сатып алып жатыр. Қазақстан автобизнес қауымдастығының мәліметінше, биыл он айда отандастарымыз 97 737 көлік сатып алса, қазан айында 9 870 жаңа көлік сатылған. Қытай көліктері ең танымал бренд машиналардың қатарында.

Қазақстандық автокөлік сарапшылары Қытайдың автоөнеркәсібі қарқынды дамып жатыр деп есептейді. Сонымен қатар, қытайлықтар модельдерді қажетті функциялармен және опциялармен жабдықтауға тырысады. Олардың көліктері бүгінде еуропалық және жапондық брендтерден еш кем түспейді, кейде тіпті кейбір жағынан олардан асып түседі.

«За рулем» журналының бас редакторы, автосарапшы Алексей Алексеев қытай брендтерінің Қазақстанда танымал болуы бірнеше себептерге байланысты екенін айтты.

«Қазір әлемде автомобиль өнеркәсібіндегі дағдарыс бар, бұл чиптердің тапшылығына байланысты. Сондықтан бүгінде автосалондарда кезекте тұрғандардың саны айтарлықтай. Олар жаңа көліктерді 6 айдан 4 жылға дейін күтуге мәжбүр. Қытайлық брендтерде мұндай проблемалар жоқ. Өндірушілер нарыққа қанша қажет болса, сонша жеткізуге дайын. Сондықтан олар бізде танымалдылыққа ие болды. Сатылым бойынша Қытай көліктері алғашқы ондыққа кіреді», - деді спикер.

Оның айтуынша, қытай көліктері заманауи және жақсы дизайнмен ерекшеленеді. Өндірушілер 7 жылға дейін кепілдік береді.

«Сенімділік тұрғысынан мен әлі ештеңе айта алмаймын. Барлығын уақыт көрсетеді. Айта кетейін, қытайлық көліктер технологиялық жағынан өте дамыған. Оларда опциялардың үлкен тізімі бар. Кейбір танымал және қымбат брендтерде бұл тіпті жоқ», - деп атап өтті автосарапшы.

Алексей Алексеев қытайлық брендтерден бас тартуға ешқандай себеп көрмейді, бірақ көлік сатып алғанда әр адам өз бетінше таңдау жасауы керек. Ол қытайлық көліктердің үнемді екенін және қосалқы бөлшектер тапшылығынан зардап шекпейтінін атап өтті.

«Жалғыз нәрсе - өтімділік уақыты. 3-5 жыл жүрген көліктің бағасы қаншаға төмендейді оны әзірге ешкім білмейді, - деді спикер.

Автоблогер Диаз Әбілқасовтың пікірінше, Қытай автоиндустриясы дизайнда креативті бола бастады.

«Менің ойымша, дизайн және жабдық жағынан Қытай автомобильдері жаһанданудың, автомобиль өнеркәсібінің қуатты дамуының арқасында үлкен жетістіктерге жетті, бірақ технологияда белгілі бір қиындықтар бар. Мысалы, машинаның бағдарламасын реттеу мен тестілеуде. Көбінесе беріліс қорабы мен қозғалтқыштың келісілген жұмысын реттеу мүмкін емес. Осында проблемалар бар», - деп атап өтті автоблогер.

Диаз Әбілқасов қытайлық брендтердің жақсы қозғалтқыштарға, беріліс қорабына, соның ішінде толық жетегіне қол жеткізу өте шектеулі екенін атап өтті. Екі литрге дейінгі қозғалтқыштардың көпшілігі турбокомпрессорлы, ал көптеген танымал кроссоверлер алдыңғы дөңгелекпен жабдықталған. Бұл Қытай автомобиль өнеркәсібінде жоғары сапалы толық жетекті жүйелердің жоқтығын көрсетеді, атап айтқанда қозғалтқыштардың әртүрлілігі жоқ.

«Бұл шағын көлемді қозғалтқыштар. Қытай заңының ерекшеліктеріне байланысты: оларда қуатты қозғалтқышы бар көліктерге салық өте жоғары. Олар шағын қозғалтқыштардың қуат тапшылығының орнын толтыру үшін шағын моторды пайдаланады», - деді Диас Әбілқасов.

Спикер қытайлық брендтердің бағасы жағынан қолайлы екенін атап өтті. Қазір қытайлық автокөлік өнеркәсібінің артықшылығы дағдарыс жағдайында оларда жеткізуде проблема жоқ.

Диаз Әбілқасовтың сөзінше, қытай көліктерінің артықшылығы- заманауи тартымды дизайны мен жабдықталуы. Кемшілігі- қытайлық көліктердің ресурсы мен сенімділігі туралы ақпараттың жоқтығы.

«Бұл көбінесе әлсіз инженерлік зерттеу, модификациялардың шектеулі саны, яғни трансмиссиялар, қозғалтқыштар. Олардың техникалық толтырылуы әлсіз. Қазақстандықтарды қорқытатын басты нәрсесі – көліктердің өтімділігі. Тұтынушыларымыз бұл көлікті қайталама нарықта қаншаға сатамыз, бағасы қаншаға жоғалады деп ойлайды», - деп қосты ол.

Ал, тәуелсіз автокөлік одағының төрағасы Эдуард Эдоков ҚХР әлемдегі ең ірі автокөлік өндірушілердің біріне айналып келе жатқанын атап өтті.

«Кейбір позициялар бойынша, мысалы, электр көліктерін өндіруде Қытай бүкіл әлемді басып озады. Қытайда жасалған электромобильдер сапасы мен өнімділігі жағынан әлемдік брендтерден жоғары. Ал іштен жанатын қозғалтқышы бар көліктерге келетін болсақ, жағдай біршама нашар», - деді ол.

Эдуард Эдоков Қытай көлігі неғұрлым жақсы болса, соғұрлым қымбаттайтынын айтты. Нарықтың заңы сондай, сапалы өнім арзан болмайды.

«Сатып алушылар брендтің тарихына, өндіріс көлеміне, кепілдік шарттарына назар аударуы керек, егер оларға бәрі ұнаса қытайлық көліктерді сатып алуға болады», - дейді автор.

Бұған дейін бұқаралық ақпарат құралдарының бірі қазақстандық нарықта ресми ұсынылған қытайлық автокөлік брендтерінің саны 2019 жылғы 1,96%-дан 2022 жылғы тамызда 6,55%-ға дейін өскенін хабарлауда.

Фото: 627400.ru, rus.azattyq-ruhy.kz