1 сәуірде WorldSkills чемпионатының аймақтық кезеңдері басталады. Эстафетаны бірінші болып Павлодар облысының колледж студенттері бастайды. Колледжішілік жарыстардың 243 қатысушысы 50 түрлі салада өздерінің кәсіби шеберліктерін көрсетеді. Өңірлік чемпионаттың нәтижелері осы жылдың мамыр айында белгілі болады. Жарыстың өңірлік кезеңі еліміздің барлық 20 аймағында өтеді. Жеңімпаздар биыл қараша айына жоспарланған «WorldSkills Kazakhstan 2024» Ұлттық чемпионатына қатысады. Бірінші және екінші орын жүлдегерлері дайындықтың келесі кезеңіне жолдама алып, үш ай бойы оқу-жаттығу лагерлерінде өз дағдыларын жетілдіреді. Кезең жеңімпазы ұлттық құраманың сапында, Данияда өтетін EuroSkills 2025 Еуропа чемпионатына еліміздің намысын қорғауға аттанады. Қазіргі уақытта өңірлік чемпионаттарды өткізуге дайындық жүріп жатыр. Астанада WorldSkills Kazakhstan Бас Ассамблеясының отырысы өтті. Іс-шараға барлық өңірлерден келген техникалық делегаттар мен ассистенттер, сондай-ақ бейінді ведомство өкілдері қатысты. Өзінің құттықтау сөзінде Оқу-ағарту министрінің бірінші орынбасары Наталья Жұмаділдаева WorldSkills қозғалысының маңызын атап өтті. Сондай-ақ, колледждер, техникалық және кәсіптік білім департаменті, «Talap» КЕАҚ алдында әрбір колледж студентін жұмысқа орналастыру және жұмысшы мамандықтарының беделін арттыру сияқты жауапты міндеттер тұрғанына тоқталып өтті. Оның айтуынша, WorldSkills құралы ерекше, өйткені ол жастарға жақсы дамуға көмектеседі, кәсіби стандарттарды көтереді және әр саладағы маңызды адамдардың назарын аудартады. Техникалық комитет WorldSkills жарыстарын өткізудің жаңа ережелері туралы шешім қабылдады. Бұл ережелерге мыналар кіреді: қатысушылардың жас шектеулерін 21 жасқа дейін төмендету (бұрын 22 жас болған); қатысушыларды бағалайтын сарапшылар үшін қатаң жазалар; кем дегенде 70% нәтижемен сынақтардан сәтті өткен сарапшылар ғана жарысқа қатыса алады. Айта кетейік, WorldSkills Kazakhstan Бас Ассамблеясы қазақстандық қозғалыс аясындағы жоғары басқару органы саналады.

ҚазАқпарат