"Ұлттық ақпараттық технологиялар акционерлік қоғамы" еліміздің UTC +05.00 бірыңғай уақыт белдеуіне көшуіне байланысты кейбір ақпараттық сервистердің қызметін қалып келтіріп жатыр.

2024 жылғы 29 ақпаннан 1 наурызға қараған түні UTC +05.00 бірыңғай уақыт белдеуіне көшу жұмыстары жүргізілді.

"Ұлттық ақпараттық технологиялар" АҚ контурындағы 64 ақпараттық жүйе орналасқан 11 мыңнан астам виртуалды серверлер бойынша (eGov.kz порталы, egov mobile мобильді қосымшасы, e-license порталы, "Е-Нотариат" бірыңғай нотариаттық ақпараттық жүйесі, "Техникалық байқаудың бірыңғай ақпараттық жүйесі", "e-Otinish" электронды үндеу қызметі және т.б. ақпараттық жүйелер) жаңартулар жүргіздік", - делінген хабарламада.

Ұлттық ақпараттық технологиялар" АҚ-ның мәліметінше, мемлекеттік органдар өз құзыретіндегі ақпараттық жүйелер бойынша осындай жұмыстарды жүргізді.

Хабарламада жүйелер штаттық режимде жұмыс істейтіні, мемлекеттік қызметтерді eGov.kz арқылы алу да әдеттегідей қолжетімді екені айтылған.

"Цифрлық құжаттар" сервисінде деректердің дұрыс көрсетілмеуінің жеке жағдайлары анықталды. Қазіргі уақытта біз барлық қажетті жұмыстарды жүргізіп жатырмыз және ағымдағы деректер жақын арада қолжетімді болады. Қолайсыздықтар үшін кешірім сұраймыз", - деп атап өтті "Ұлттық ақпараттық технологиялар" АҚ.

Айта кетейік, сағат тілі ауысқаннан кейін кейбір қазақстандықтардың электронды құжаттарда туған күні өзгеріп кетті.

Кейбіреулерінде жеке куәлікте, басқаларында жүргізуші куәлігінде, енді бірінде төлқұжатында туған күні өзгергені анықталды.

 ҚазАқпарат