Британиялық туристік компаниялар Ұлы дала еліне шетелдік саяхатшыларды көптеп тартуды жоспарлап отыр. Бұл туралы олар Қазақстанның Ұлыбританиядағы елшілігінде өткізілген Роуд шоуда айтты.

Қазақстанның туристік әлеуеті зор: бай тарихымыз бен мәдениетіміз, көркем табиғатымыз бен сәулетіміз бар. Бірақ олар туралы шетелдіктер біле бермеуі мүмкін. Бүгінгі шара сол олқылықтың орнын толтыруға бағытталған. 9-ға жуық отандық туристік компания өкілі 30-дай британиялық әріптесімен кездесіп, Ұлы дала еліне саяхаттаудың артықшылықтары туралы айтып берді.

«Британиялық ірі туроператорларды түгелдей дерлік шақырдық. Олардың қатарында өз өнімдері мен қызметтерін онлайн ұсынатын агенттіктер бар. Сондай-ақ саяхаттарын 1-2 жылға алдын ала жоспарлайтын, әуе билеттерін көтерме бағамен сатып алып, туристерге ұсынатын компаниялардың өкілдері де келді. Барлығы өзге мемлекеттермен қатар Қазақстанды да насихаттауға келісіп отыр», дейді қазақстандық әуе компаниясының өкілі, шара ұйымдастырушысы Ричард Леджер.

Алан Роджерс - ірі британиялық турагенттіктің бөлім бастығы. Оның мамандары туристің талғамы мен қалтасына қарай саяхат жоспарлап береді. Жиған-тергенін жер-жаһанды шарлауға жұмсайтын зейнеткерлер 27 жылдан бері осы компанияның қызметіне жүгініп келеді.

«АҚШ, Жапония, Үндістан, Австралия және басқа да елдерге турлар саттық. Енді Қазақстанды да туристік бағыт ретінде ұсынғымыз келеді», дейді Алан.

«Елдеріңіздегі табиғат көріністері ғажап, халқы да керемет. Әлгінде ғана тамақтарыңыздан дәм татып, тәнті болдым. Қазақстанға туристерді көптеп жіберуге деген ниетіміз бар. Бірақ алдымен туроператорларыңызбен тығыз жұмыс істеп, ақпарат алмасуымыз керек. Бүгінгі шараның берері мол», дейді Аудлей Травел агенттігінің бөлім бастығы Алан Роджерс.

Отандық компаниялар арасында шырайлы Шымкент шаһарына шақырып, туристік әлеуетін таныстырған операторлар да болды. Олар өздерімен бірге оңтүстіктің тәттілері мен шәйін де ала келіпті. Шымкентті Қазақстанның гастрономиялық туризм отаны деп таныстырды. Өйткені түрлі елдердің сан-алуан тағамдары дәмді және қолжетімді бағада сатылады, дейді олар.

«Шымкент қаласына келуші туристердің саны жыл санап артып келе жатыр. 2022 жылдың өзінде 400 мыңнан астам, 500 мыңға жуық турист келген. Оның ішінде қазақстандық туристер де бар. Шетелдік туристер де өте қөп. Ұлыбританиядан да келетін туристердің саны жыл санап артып келе жатыр», дейді Шымкент қаласы Туризм басқармасының бас маманы Ғазиза Кулимова.

Бүгінде Ұлы дала елінің тартымдылығын арттыру үшін тындырылған іс көп. 80-нен астам елдің азаматы Қазақстанға 30 күнге дейін визасыз кіре алады. Олардың қатарында британиялықтар да бар. Оған қоса 109 мемлекетке визаны онлайн оңай алуға мүмкіндік берілген. 600-ге жуық халықаралық ұшақ апта сайын 30-дан астам елге тікелей қатынайды. Алдағы уақытта Токио, Сингапур және Нью-Йорке де тікелей рейстер ашу жоспарланып отыр.

Дереккөз ҚазАқпарат. Фото: Ғалымжан Қараманұлы