Таяуда Балқаш қаласының маңындағы Қазақстан Республикасы Қарулы Күштерінің Әскери әуе күштеріне қарасты полковник Асанов Азамат Нұрымұлы басшылық ететін 53898 әскери бөлімінің авиациялық оқу-жаттығу орталығына жолым түсті. Мақсат әскери бөлімнің  тыныс-тіршілігімен танысу. 

Алдымен ат басын авиациялық оқу-жаттығу орталығының техникалық пайдалану бөлімінің авиациялық қозғалтқышқа регламент жасау және жөндеу тобына тіредік. Осы топқа жетекшілік ететін әскери әуе қорғанысы саласында көп жылдан бері мінсіз қызмет атқарып келе жатқан майор Дәулетбаев Арман Қадырғалиұлынан  қарамағында инженер, авиациялық аға техник,  аға маман және қосымша 2 маман кәсібіндегі маман иелері қызмет ететінімен білдік. Топтың басты мақсаты – әскери ұшақтың техникалық сипаттамасын қалыпты жағдайға келтіру үшін авиациялық қозғалтқышқа регламент жасау болып табылады. Топтағы жеке құрам арасынан инженер капитан Радион Вадимович Корешников, техник 3-ші сыныпты сержант Огай Евгений Юрьевич және маман ефрейтор Кәрімов Бауыржан Асқарбекұлы өздеріне тиісті қызметтерін атқару барысында асқан жауапкершілік танытып келе жатқанынан хабардар болдық.

Келесі кезекте, өздерінің әскери ұшақты басқарудағы тәжірибелерін шыңдап жүрген курсанттармен таныстық. Ақтөбе қаласының екі мәрте Кеңес Одағының Батыры Т.Ж. Бигельдинов атындағы Әуе қорғаныс күштерінің әскери институтынан келген курсанттар авиациялық оқу-жаттығу орталығына үш жарым айға арнайы дайындықтан өтуге арнамақшы. Бізді қарсы алған курсантарға жол көрсетуші ұшқыш нұсқаушы капитан Ербол Нұрмолда қарамағында 19 курсанттың бар екенін жеткізді. Әскери шенді капитан Ербол Ермекұлы: «Біздің авиациялық оқу-жаттығу орталығында курсанттар әскери ұшақты басқаруды үйренеді. Үш жарым айдың ішінде курсанттар іс жүзінде жан-жақты дайындалады. Басты назар – алдымен курсанттар медициналық тексерістен өтетінін» - жеткізді.

Алаңда ұшуға дайындық жасап жүрген курсанттар Абай облысы, Аягөз қаласының тумасы Ұлан Әсілбеков пен Қостанай облысының, Меңдіқара ауданында туып өскен Ернар Темірбаевпен танысып аз-кем әңгімелескеннен кейін, курсанттар арасында ұшу бойынша озат танылып жүрген Асыл Әбдіхан мен озат курсант Үсен Нұртілеумен жақынырақ таныстық. Курсанттардың арасында Тәжік Республикасының 2 азаматы өз білімін Қазақстанда алып жатқанын естіп білдік. Абдусалом Саломов пен Алишер Мирзоавлиёев  Қазақстанның әскери оқу орнын аяқтаған соң, бар білім мен тәжірибесін туған елі Тәжікстан Республикасының әскери әуе күштерін дамытуға жұмсайтынын атап өтті.

Лейтенант

Думан Құрманғалиев,

Приозерск гарнизонының

баспасөз хатшысы.