Алматыда қаржы пирамидасына алданғандарға 123 млн теңге қайтарылды

Алматыда қаржы пирамидасына ақша салған жүздеген адамның қаражаты қайтарылды, деп хабарлайды Sputnik Қазақстан қаржылық мониторинг агенттігіне сілтеме жасап.

Бұған дейін агенттіктің Алматы қаласы бойынша департаменті қаржы пирамидасының қызметін ұйымдастыруға қатысты сотқа дейінгі тергеуді аяқтаған болатын. Пирамида "B2B Jewelry" зергерлік дүкендер желісінің атын жамылған.

"Жүргізілген жұмыс нәтижесінде "B2B Jewelry" қаржылық пирамидасының 197 салымшысына 123 миллион теңге қайтарылды", - дейді агенттік мамандары.

Айта кетері, сот үкімімен қаржы пирамидасын ұйымдастырушы кінәлі деп танылып, 6 жыл 8 айға бас бостандығынан айырылған болатын. Оған қоса, 5 жыл қаржылық қызметпен айналысуға тыйым салынды.

Қалған сыбайластарына қатысты сотқа дейінгі іс жүргізу аяқталуға жақын.

sputnik.kz