Алматы облысы Жандосов ауылындағы мектепте оқушыларға жарамдылық мерзімі өтіп кеткен иогурт берілген, деп хабарлады облыстық білім басқармасы.

Оқушыларға екі жыл бұрынғы йогурт берілгені туралы ақпарат әлеуметтік желіде тараған.

"Желіде тегін ыстық тамаққа қосымша ретінде берілетін сүзбешенің қолдану мерзімі 2021 жылы өтіп кеткені туралы ақпарат тарады. Бұл ақпаратты анықтау үшін шұғыл жұмыс тобы мектепке жіберілді", - дейді облыстық білім басқармасы.

Мектеп асханасы тексеріліп, тамақтану сапасына мониторинг жүргізу актісі толтырылған. Йогурттың қана емес, "Айналайын" сүт өнімдерінің де пайдалану мерзімі өтіп кеткені анықталды.

"Растишка" сүзбешесі, "Айналайын" сүт өнімінің мерзімі өткендігі анықталып, қолдануға тыйым салынды. Жауапты мамандардан түсініктеме алынды", - дейді ведомство.

Енді олар тәртіптік жауапкершілікке тартылады. Жеке кәсіпкерге хабарлама жіберіліп, асхана жұмысы қатаң бақылауға алынды.

ҚазАқпарат