Астана қаласындағы №5 «Ақбота» балабақшасында бала мен кітаптың байланысын заманауи технология арқылы күшейтуге бағытталған «Ақылды кітапхана: AI және ART әлемі» жобасы жүзеге асырылып жатыр.
Жобаның негізгі мақсаты – баланы кітапқа ерте жастан жақындату. Бұл жерде жасанды интеллект кітаптың орнын баспайды. Керісінше, ертегіні қызығырақ қабылдауға, кейіпкерлермен виртуалды түрде тілдесуге, сұрақ қойып, оқиғаға өз көзқарасын білдіруге мүмкіндік береді. Яғни бала дайын ақпаратты тыңдап қана қоймай, шығармаға ойымен араласады.
Бастаманың маңызды тұсы – ұлттық мазмұнға басымдық берілуі. Қазақ ертегілері мен халыққа таныс кейіпкерлер арқылы бүлдіршіндер жақсылық пен жамандық, адалдық пен әділдік, батылдық пен жауапкершілік секілді ұғымдарды ерте жастан түсіне бастайды. Осылайша технология баланы кітаптан алыстатпай, керісінше, кітаптағы мазмұнды тереңірек сезінуге дәнекер болып отыр.
«Ақылды кітапхана» идеясын маңызды ететін де осы – цифрлық мүмкіндіктер мен дәстүрлі оқуды қарсы қоймай, екеуін бір арнада ұштастыру. Бүгінгі бала технологияны еркін меңгеріп келеді. Сондықтан оның сол қызығушылығын кітапқа бұру – оқу мәдениетін қалыптастырудың тиімді жолдарының бірі. Жоба алдағы уақытта жаңа ертегілермен, кейіпкерлермен және танымдық тапсырмалармен толықтырылмақ.
