Жүйе бірнеше өңірде енгізілді.
Денсаулық сақтау саласындағы нәтижелі кейстердің бірі – Cerebra AI. Бұл туралы Жасанды интеллект және цифрлық даму министрі Жаслан Мәдиев айтты.
"Бұл – инсультті ерте диагностикалауға арналған жасанды интеллект. Ол компьютерлік томография нәтижесін 30 минуттың орнына 5-10 минут ішінде талдайды. Инсульт диагностикасын едәуір жылдамдатады және дәлдігін арттырады", – деді ведомство басшысы.
Жүйе елордадағы 17 емханада, сондай-ақ Ақмола, Маңғыстау, Жамбыл және Алматы облыстарында енгізілді.
"2025 жылғы 1 қыркүйектен бастап инсультке күдігі бар жеті мың алты жүзден астам пациенттің деректері талданды. Өлім-жітім деңгейінің 40%-ға төмендеуі, сондай-ақ уақытылы ем алатын пациенттер үлесінің 150%-ға артқаны байқалады", – деп атап өтті Жаслан Мәдиев.
Дерек көзі: https://inbusiness.kz