Таиланд қылмыстың алдын алу мақсатында туристердің елде визасыз болу мерзімін 60 күннен 30 күнге дейін қысқартады, деп хабарлайды The Nation.
kaz.inform.kz жазғанындай, бұл шара 2024 жылдың шілдесінен бастап 60 күнге дейін визасыз режимді енгізген 93 елден келген туристерге қатысты болады.
Таиланд Сыртқы істер министрлігі шетелдік туристердің визасыз болу мерзімін қысқарту жоспарын Министрлер кабинетіне бекітуге ұсынбақшы. Бастаманы қаралатын нақты күн әлі жарияланған жоқ.
Бұл шешім шетелдік азаматтардың заңсыз әрекеттері туралы хабарламаларға, сондай-ақ белгісіз адамдардың елде заңсыз болу жағдайларына байланысты қабылданды.
Осыған байланысты тай билігі келушілердің сапарларының көрсетілген мақсатына сәйкес келуіне көз жеткізу үшін визасыз режимді ғана емес, сонымен қатар басқа виза түрлері үшін де тексеруді күшейтуді жоспарлап отыр.
Биліктің пікірінше, болу мерзімін қысқарту өздерін турист болып көрсетіп, елге басқа мақсаттар үшін келген жеке тұлғалардың кіру қаупін азайтады.
Зерттеуге сәйкес, шетелдік туристердің Таиландта орташа болу уақыты қысқа және ұзақ мерзімді сапарлар үшін тоғыз күннен сәл асады.
Таиландтың туризм және спорт министрі Сурасак Пханчароенворакул атап өткендей, елге тағылымдамадан өту немесе медициналық емдеу сияқты басқа мақсаттармен келетін шетелдіктер тиісті визаларды ресімдей алады.
- Біз 60 күн тым ұзақ болуы мүмкін деп санаймыз және шынайы турист емес кейбір адамдар визасыз режимді заңсыз мақсаттарда пайдаланып жатыр. Біз бақылауды күшейткіміз келеді, - деді ол.
Билік визасыз болу мерзімінің қысқаруы туристер ағынына кері әсер етпейді деп үміттенеді.
2026 жылдың 1 қаңтарынан 10 мамырына дейін Таиландқа 12,4 млн шетелдік турист келді. Бұл өткен жылдың сәйкес кезеңімен салыстырғанда 3,43% аз.
Туризм Таиланд экономикасының негізгі қозғаушы күштерінің бірі болып қала береді. 2019 жылы шетелден келген туристердің рекордтық саны тіркелді, сол кезде елге шамамен 40 млн адам келген.
Ақпарат kaz.inform.kz сайтынан алынды.