Бүгін Нұрғиса Тілендиевтің туғанына — 100 жыл

Композитор 50-ден астам драмалық қойылымға, 19 көркем фильмге, 17 мультипликациялық фильмге, 14 деректі-хроникалық фильмге музыка жазған

Бүгін композитор, дирижер, Қазақстанның еңбек сіңірген өнер қайраткері, Халық қаһарманы Нұрғиса Тілендиевтің туғанына — 100 жыл.

Дәулескер домбырашы 1925 жылдың 1 сәуірінде Алматы облысы Іле ауданында дүниеге келген.

Мәдениет және ақпарат министрлігі жариялаған дерекке сәйкес, әртүрлі жылдары Абай атындағы Қазақ мемлекеттік академиялық опера және балет театрының дирижері, Қазақтың халық аспаптар оркестрінің бас дирижері, Қазақфильм киностудиясы музыка редакциясының бас редакторы, 1981 жылдан Отырар сазы фольклорлық-этнографиялық ансамблінің ұйымдастырушысы әрі көркемдік жетекшісі қызметтерін атқарды.

Нұрғиса Тілендиев "Алтын таулар" операсының (Қ.Қожамияровпен бірге), "Достық жолымен" балетінің (Л.Степановпен бірге), "Ортеке" балет-поэмасының, "Менің Қазақстаным" кантатасының, оркестрге арналған "Поэма", "Ата толғауы", "Ақсақ құлан", "Аққу", "Арман", "Махамбет", "Көш керуен" поэмалары мен "Халық қуанышы", "Қайрат", "Жеңіс салтанаты" атты кіріспелердің, 400-ге тарта ән мен романстың авторы.

Композитор 50-ден астам драмалық қойылымға, 19 көркем фильмге, 17 мультипликациялық фильмге, 14 деректі-хроникалық фильмге музыка жазған.

Бірегей тұлға екі рет Еңбек Қызыл Ту орденімен марапатталған.

ҚазАқпарат