Үндістанда діни мереке кезінде 18 адам көз жұмды

 Үндістан астанасы Нью-Делидің теміржол вокзалындағы қайғылы жағдай құрбандарының саны 18-ге жетті. Адамдар діни мереке үшін үйіне асығып, вагондарға ұмтылғанда аяқ астында тапталып қалған, деп хабарлайды The Hindu басылымы.

Оқиға үнділердің ең ауқымды фестивалі — Кумбха Мела өтетін орын Праяградж қаласына аттанғалы тұрған пойыздардан орын алу кезінде болған.

Дели полициясының хабарлауынша, Нью-Дели теміржол вокзалындағы кептеліске «уақытынан кеш қаламын» деп асыққан жолаушылардың Prayagraj Express және Prayagraj Special пойызы бағыты арасында адасып, абдырап қалуы себеп болған.

Қайтыс болған 18 адамның үшеуі жеті, сегіз және он бес жастағы қыздар. Тағы бір 24 жастағы әйел, 35-45 жас аралығындағы тоғыз әйел мен 70 жастағы бір әжей де қаза тапты. Сондай-ақ 12 жастағы бала мен 25, 45 және 47 жастағы үш ер адам қаза тапқан. Жараланған 15 адамның тоғызы ер адам, алтауы әйел. Олардың үшеуі ауыр, 12-сі жеңіл жарақат алған.

— Жалпы 15 адам зардап шекті. Олардың көпшiлiгiнiң жағдайы тұрақты, жарақаттары бар, — делінген хабарламада.

Бұған дейін, Үндістанның Праяградж қаласында өтіп жатқан Кумбха Мела фестивалінде болған адамдардың қақтығысынан 30-ға жуық үндістандық қаза тауып, 90-ға жуығы жарақат алғанын жазған едік.

Материал kaz.inform.kz сайтынан алынды.