Автобус ішін жатын орынға айналдырған жүргізушіге айыппұл салынды

Автобус жүргізушісі жолаушыларға қалааралық тұрақты тасымалдаудың күмәнді әдісін ұсынған

Қостанай облысында жолаушылар қауіпсіздігін елемеген автобус жүргізушісі жауапқа тартылды, — деп хабарлайды Polisia.kz.

Қостанай облысының "Алматы — Екатеринбург" тас жолында полицейлер заңсыз жабдықталған "YOTONG" автобусын тоқтатты. Салонда әдеттегі орындықтардың орнына 36 жтын орын орнатылған.

"Түркістан облысының 40 жастағы тұрғыны, автобус жүргізушісі жолаушыларға қалааралық тұрақты тасымалдаудың күмәнді әдісін ұсынған. Автобуста техникалық сынақтардан және тиісті сараптамалардан өтпеген конструкциялар қолданылғаны ерекше алаңдатады. Іс жүзінде жүргізуші автобустың құрылысына өз бетінше өзгерістер енгізген", - деп жазылған материалда.

Зерттеулер көрсеткендей, орындардың осындай құрылымы апаттар кезінде қажетті қауіпсіздікті қамтамасыз етпейді. Автобус соқтығысқан жағдайда осындай құрылымдар жолаушыларды ұстап қала алмайды, бұл ауыр жарақаттарға әкеп соғуы мүмкін.

Полицейлер барлық кемшіліктер жойылғанға дейін автобусты пайдалануға тыйым салу арқылы жедел шаралар қабылдады және автобусты рұқсатсыз қайта жабдықтағаны үшін жүргізушіге 60 мың теңге айыппұл тағайындады.

ҚазАқпарат