Оқиға орнында полиция қызметкерлері мен "ҚазАвтоЖол" мамандары жұмыс істеп жатыр

"Астана - Петропавл" автожолында қолайсыз ауа райы салдарынан 95 көлік соқтығысты, деп хабарлайды "ҚазАвтоЖол".

3 қаңтарда сағат 07:20-да "Астана-Петропавл" республикалық маңызы бар автожол учаскесінде (18-232 км) ауа райының нашарлауына байланысты автокөліктің барлық түрі үшін қозғалыс шектелді.

Ауа райы жақсарып, жол сағат 12:30-да тазаланғаннан кейін Щучинск қаласына қарай қозғалыс "ҚазАвтоЖол" мен полиция департаменті қызметкерлерінің сүйемелдеуімен ұйымдастырылды.

"Алайда, алдын ала мәліметтер бойынша, жүргізушілердің жылдамдық режимін және қауіпсіз қашықтықты сақтамауына байланысты тас жолдың 153-ші шақырымында сағат 13:28-де Жаңаталап ауылының ауданында шамамен 95 автомобиль жаппай соқтығысты", - дейді ведомстводағылар.

Оқиға орнында полиция қызметкерлері мен "ҚазАвтоЖол" мамандары жұмыс істеп жатыр. Бір жолақ тазартылды, жүруге жарамды көліктер қозғала бастады. Қазір оқиға орнында 22 жол көлігі мен трактор жұмылдырылды.

Айта кетейік, бүгін сағат 13:30-дағы ақпарат бойынша оқиға болған жерде 40-қа жуық көлік соқтығысқан болатын.

ҚазАқпарат