Кезінде Сауд Арабиясының мұнай министрі шейх Яманидің айтқаны бар: "Тас ғасыры тастың таусылғанынан аяқталған жоқ. Сол сияқты мұнай дәуірі де өтеді". Ал оған дейін мұнай – байлық, мұнай – саясат, мұнай – билік болып қала бермек. Әзірге жаһандық экономика ертеңін мұнайсыз елестету мүмкін емес. ХХ ғасырда дәуірлеген мұнай беделі ХХІ ғасырда да шарықтай көтерілмесе төмендейтін түрі жоқ. Бүгінге дейін мәлім болып отырған жаңғырмалы энергия көздерінің таяу болашақта мұнайға балама бола алмайтынын қазақстандық білікті сарапшылар ашық айтып жатыр. Кейінгі кезде тұрақтанған және біршама көтеріле бастаған жаһандық мұнай бағасы еліміз экономикасының тамырларына қан жүгіртіп, ішкі жалпы өнімнің өсуіне мүмкіндік берді. Жалпы қара алтын біздің бағымыз ба, әлде сорымыз ба? Мұнайға қатысты көкейде жүрген көптеген сұрақты белгілі экономист Мақсат Халыққа қойған едік.