60-тан астам ұстаз "Үздік педагог" атағын алды

Жеңімпаздар марапатпен бірге 1000 АЕК көлеміндегі сыйақыға ие болды

Оқу-ағарту министрі Жұлдыз Сүлейменова ұстаздарды "Үздік педагог" атағымен марапаттады, деп хабарлайды ведомствоның баспасөз қызметі.

Елімізде 2012 жылдан бастап өткізіліп келе жатқан дәстүрлі байқаудың нәтижесі бойынша осыған дейін 752 ұстаз "Үздік педагог" атағын иеленген.

Биылғы жылы бұл атаққа қазақстандық 64 мұғалім лайықты деп танылды. Жеңімпаздар марапатпен бірге 1000 АЕК көлеміндегі сыйақыға ие болды.

"Бұл байқау дәстүрлі түрде өткізіліп келеді. Мемлекеттің ұстаздарды қолдауы білім саясатының басты бағыты ретінде айқындалады. Республика көлемінде үздік педагогтер пулы қалыптастырылды. Ендігі міндет – әр білім беру деңгейі бойынша үздік ұстаздарымыздың озық тәжірибесін кеңінен таратып, жас педагогтерді тағылымдамадан өткізу арқылы кәсіби дамуына жүйелі қолдау көрсету", - деді министр құттықтауында.

Айта кету керек, биылғы жылы "Үздік педагог" республикалық байқауының іріктеу кезеңіне 1468 маман қатысып, одан өткен 793 педагог облыстық деңгейде бақ сынады. Дәстүрлі конкурстың финалдық кезеңіне 174 маман жолдама алды. Оның ішінде орта білім беру, кәсіптік және техникалық білім беру, мектепке дейінгі, қосыша білім беру ұйымдарының педагогтері бар.

Дерек көзі: https://sputnik.kz