Қазақстан Республикасы Президентінің жанындағы Ұлттық ғылым академиясы әлемнің жетекші ғалымдарын өзінің шетелдік мүшелері етіп сайлады.
Бұл шешім отандық ғылымның халықаралық ғылыми ортадағы байланысын кеңейтуге жол ашады. Академия құрамына Түркия, Марокко, Қытай және Ұлыбританиядан танымал зерттеушілер енді. Олардың әрқайсысы медицина, жасанды интеллект, генетика, селекция және басқа да маңызды бағыттарда еңбек етіп жүр.
Жаңа мүшелер қатарында Түркия Ғылым академиясының президенті, профессор Музаффер Шекер бар. Сондай-ақ медицина мен ядролық технологияларды зерттейтін МАГАТЭ бас директорының орынбасары Наджат Мохтар, жасанды интеллект саласының маманы Кай-Фу Ли және бидай генетикасы мен селекциясы бойынша британдық ғалым Саймон Гриффитс бар.
Ғалымдардың Академия құрамына қосылуы тек мәртебелік қадам емес. Бұл Қазақстандық зерттеушілермен бірлескен жобалар жүргізуге, жаңа технологияларды дамытуға және халықаралық тәжірибені ел ғылымына енгізуге мүмкіндік береді. Әсіресе жас ғалымдардың білімі мен кәсіби әлеуетін арттыруға ықпалы зор.
Ұлттық ғылым академиясы осындай халықаралық байланыстарды алдағы уақытта да кеңейтуді көздеп отыр. Яғни, әлемдік ғылыми қауымдастықпен әріптестікті күшейту арқылы Қазақстан ғылымының жаңа зерттеулер мен инновациялық жобалардағы мүмкіндігін арттыру басты бағыттардың бірі болмақ.
