Астаналық медицина ғылымдарының докторы және жоғары білікті жұқпалы аурулар жөніндегі маман Динагүл Байешева вакцинаға қатысты ең көп таралған қате түсініктердің бірін жоққа шығарды. Бұл туралы Standard.kz порталы Stan.kz ақпарат агенттігіне сілтеме жасай отыра хабарлайды.
Көптеген ата-аналар балалардағы аутизмді вакцинациямен байланыстырады, себебі белгілері вакцинациядан кейін пайда болуы мүмкін.
"Ғылым нақты жауап береді: вакцина аутизмді тудырмайды. Бұл миллиондаған балалар қатысқан ауқымды зерттеулермен расталды. Неліктен мұндай ой пайда болды? Аутизмнің алғашқы белгілері көбіне 1,5-2 жаста – дәл екпе салдыратын кезеңінде байқалады. Бірақ бұл жай ғана кездейсоқтық. Түсіну маңызды: сәйкестік себеп пен салдарды білдірмейді", – деді Астана медициналық университетінің балалар жұқпалы аурулары кафедрасының меңгерушісі Динагүл Байешева.
Медицина ғылымдарының докторы аутизм туылғанға дейін де дамитынын және мидың дамуымен және генетикалық факторлармен байланысты екенін айтты. Вакциналар бұл процестерге әсер етпейді, олар балаларды қауіпті инфекциялардан қорғайды.
"Дәрігерлер күн сайын қызылша, көкжөтел және басқа да алдын алуға болатын аурулардың ауыр зардаптарымен бетпе-бет келеді. Кейде тым кеш болады. Вакцинация – бұл қауіп емес, қорғаныс", – деп атап өтті жұқпалы аурулар жөніндегі маман.
Вакцинация мен аутизм арасындағы байланыс туралы қате түсінік 1998 жылы The Lancet журналында мақала жарияланғаннан кейін пайда болды. Кейінірек мақалада келтірілген деректер бұрмаланғаны, мақала қайтарып алынғаны және оның авторы медициналық лицензиясынан айырылғаны анықталды.
https://stan.kz/