Көгілдір және сары түсті жейде киген оқушылар алаңға сап түзеп, Қазақстанның Мемлекеттік Туының бейнесін жасады
Түрксіб ауданындағы 2000-ға жуық оқушы Қазақстанның Республика күніне арналған жаңа «Республика күні» әнін орындады. Әннің авторы – №6 Оқушылар үйінің педагогі, композитор Біржан Әлкеев. Туынды «Елімнің жарқын болашағы: Бірлік. Рух. Тәуелсіздік!» атты ауқымды патриоттық іс-шара аясында шырқалды, деп хабарлады "Сапалы Қазақстан" порталы.
Іс-шараны Түрксіб аудандық білім бөлімі, №6 Оқушылар үйі және аудандағы 32 мектеп бірлесіп ұйымдастырды. 2000-ға жуық оқушы бір мезетте Қазақстан Республикасының Мемлекеттік Әнұранын, сондай-ақ «Республика күні» және «Атамекен» әндерін орындады.
Фото: Алматы әкімдігі.
Іс-шараның ерекше көріністерінің бірі – «Жанды ту» композициясы. Көгілдір және сары түсті жейде киген оқушылар алаңға сап түзеп, Қазақстанның Мемлекеттік Туының бейнесін жасады.
Көрермендердің ерекше назарын №83 гимназияның қазақ халық аспаптарынан құралған «Шабыт» оркестрінің өнері аударды. Ұжым ұлттық музыка мәдениетінің бай мұрасын паш етті.
Сонымен қатар арт-челлендж аясында 500 жас суретші Қазақстанның мәдени мұрасына, ұлттық дәстүріне және еліміздің жарқын болашағына арналған туындысын ұсынды.
